મહારાષ્ટ્ર સરકારનાં કૌશલ્ય વિકાસ વિભાગના વિશ્વ બેંક સાથે થયેલા કરાર મુજબ રાજ્ય સરકારે આગામી સો દિવસનો એક્શન પ્લાન તૈયાર કર્યો છે, જે અંતર્ગત પચાસ હજાર યુવાનોને તાલિમ આપવામાં આવશે એમ કૌશલ્ય વિકાસ મંત્રી મંગલ પ્રભાત લોઢાએ જણાવ્યું હતું.
મંત્રી મંગલ પ્રભાત લોઢાએ તાજેતરમાં યોજાયેલી પત્રકાર પરિષદમાં જણાવ્યું હતું કે મુખ્યમંત્રી યુવા કાર્ય તાલીમ યોજના દ્વારા આગામી સો દિવસમાં પચાસ હજાર યુવાનોને તાલીમ આપશે અને મહારાષ્ટ્ર ઇન્ટરનેશનલ સેન્ટર મુંબઈ, નાગપુર, પુણે, નાસિકની સાથે અમરાવતી અને છત્રપતિ સંભાજીગરમાં કાર્યરત થશે. મંત્રી લોઢાએ ૧૦૦ દિવસીય કાર્ય યોજનાના અમલીકરણ અંગે મંત્રાલયમાં કૌશલ્ય, રોજગાર, ઉદ્યોગસાહસિકતા અને નવીનતા વિભાગ દ્વારા કરવામાં આવી રહેલી કાર્યવાહી વિશે માહિતી આપવા માટે એક પત્રકાર પરિષદ યોજી હતી.
મંત્રી શ્રી લોઢાએ જણાવ્યું હતું કે, કૌશલ્ય વિકાસ વિભાગ અને ઉચ્ચ ટેકનિકલ શિક્ષણ વિભાગ રોજગાર આપતી સંસ્થાઓ અંગે વ્યાપક કાયદો બનાવશે. વિવિધ ૫૦૦ પ્રકારનાં કોર્સના વિડીયો બિઝનેસ એજ્યુકેશન એન્ડ ટ્રેનિંગ ડિરેક્ટોરેટ હેઠળ ઓનલાઈન ઉપલબ્ધ થશે. આજ રીતે કારકિર્દી માર્ગદર્શન શિબિરોનું આયોજન કરવામાં આવશે. હજાર શાળાઓમાં પણ, વિશ્વ બેંક સાથેના કરાર અનુસાર, આઈટીઆઈના ધોરણો સુધારવામાં આવશે. આ સાથે સો રોજગાર મેળાઓનું આયોજન કરવામાં આવશે.
સ્કીલ, એમ્પ્લોયમેન્ટ, એન્ટરપ્રેન્યોરશીપ એન્ડ ઈનોવેશન વિભાગની વેબસાઈટ અપડેટ કરવા, ઓફિસમાં સુવિધાઓ વધારવા, સરળ રહેણીકરણી, રોકાણ પ્રોત્સાહન, જાહેર ફરિયાદોનું નિવારણ, પ્રાદેશિક કચેરીઓની મુલાકાત જેવા મુદ્દાઓ પર ધ્યાન કેન્દ્રિત કરશે અને વિભાગના વહીવટને ઝડપી બનાવશે. સો દિવસના એક્શન પ્લાનમાં કૌશલ્ય યુનિવર્સિટીમાં દસ હજાર યુવાનોને માઈક્રોસોફ્ટની મદદથી આર્ટિફિશિયલ ઈન્ટેલિજન્સની તાલીમ આપવામાં આવશે એમ તેમણે જણાવ્યું હતું.
