Read inEnglishहिन्दीગુજરાતી
Health

મેનોપોઝ: એક નવો અધ્યાય, એક નવી શરૂઆત!

By Karishmma Rathod Khann  ·   ·  1 min read
મેનોપોઝ: એક નવો અધ્યાય, એક નવી શરૂઆત!

મેનોપોઝ એ દરેક સ્ત્રીના જીવનમાં આવતી એક સહજ શારીરિક પ્રક્રિયા છે, જેમાં તેના માસિક ચક્ર કાયમ માટે બંધ થઈ જાય છે. સામાન્ય રીતે, ૪૫થી ૫૫ વર્ષની વયમાં મેનોપોઝ થાય છે, જો કે કેટલીક સ્ત્રીઓને તે વધુ વહેલો કે મોડો પણ આવી શકે. આ એક કુદરતી પ્રક્રિયા છે, પણ હોર્મોનલ ફેરફારોના કારણે આ સમયગાળો શારીરિક અને માનસિક રીતે સ્ત્રીઓને પ્રભાવિત કરી શકે છે.

જો એક સ્ત્રીના જીવનને ચાર તબક્કાઓમાં વહેંચવામાં આવે, તો બાળપણ, કિશોરાવસ્થા, પ્રજનન યુગ અને મેનોપોઝ પછીનો યુગ – આ ચોથી અવસ્થા એ સ્ત્રી માટે એક નવો પડાવ છે. આ સમયગાળા દરમિયાન, તન-મન પર અસરો થાય છે, પરંતુ જો યોગ્ય વ્યવસ્થાપન કરવામાં આવે, તો સ્ત્રીઓ આ તબક્કાને સ્વસ્થ અને શાનદાર રીતે પસાર કરી શકે.

મેનોપોઝ: એક નવો અધ્યાય, એક નવી શરૂઆત!

મેનોપોઝના તબક્કાઓ અને લક્ષણો

મેનોપોઝ એકદમ અચાનક આવતો નથી. ધીરે-ધીરે શરીરમાં થતા ફેરફારોથી એ જાણી શકાય છે. તે ત્રણ તબક્કામાંથી પસાર થાય છે:

  1. પ્રી-મેનોપોઝ: આ તબક્કો ૪૦ના દાયકાના મધ્યમાં શરૂ થાય છે, પરંતુ તે ૩૦ ના દાયકાની શરૂઆતમાં અથવા ૫૦ ના દાયકાના અંતમાં પણ શરૂ થઈ શકે છે. ચોક્કસ ઉંમર વ્યક્તિએ વ્યક્તિએ બદલાય છે, જેમાં માસિક ધર્મ અનિયમિત થઈ જાય છે. સ્ત્રીઓને હોટ ફ્લેશ, ઊંઘની તકલીફ અને મૂડ સ્વિંગ્સ જેવી પરેશાનીઓ થવા લાગે છે.
  2. મેનોપોઝ: જ્યારે સ્ત્રીને એક વર્ષ સુધી માસિક ધર્મ ન આવે, ત્યારે તેને મેનોપોઝ માનવામાં આવે છે.
  3. પોસ્ટ-મેનોપોઝ: મેનોપોઝ બાદના વર્ષોમાં હાડકાંની તાકાત ઓછી થાય છે, હૃદયરોગનું જોખમ વધી શકે છે, અને ત્વચા અને વાળમાં પણ ફેરફાર જોવા મળે છે.

મેનોપોઝના લક્ષણો

હોટ ફ્લેશ, રાત્રે પરસેવો, મૂડમાં સતત બદલાવ, ઊંઘની તકલીફ, વજનમાં વધારો, ત્વચાનું સૂકાપણું, હાડકાં નબળા થવા (ઓસ્ટિયોપોરોસિસ), યોનિ સૂકાશ અને સંભોગ દરમિયાન તકલીફ

મેનોપોઝ પછીના આરોગ્ય સંબંધિત પડકારો

૧. હૃદયરોગનું જોખમ
એસ્ટ્રોજન હોર્મોન હૃદયને સુરક્ષિત રાખવામાં મહત્વપૂર્ણ ભૂમિકા ભજવે છે. મેનોપોઝ પછી એસ્ટ્રોજનનું સ્તર ઘટી જતાં સ્ત્રીઓને હૃદયરોગનું જોખમ વધી જાય છે.

૨. હાડકાંની તાકાત ઘટવી
મેનોપોઝ પછી ઓસ્ટિયોપોરોસિસ થવાનું જોખમ વધી જાય છે, જે હાડકાંને નબળા બનાવે છે.

૩. વજનમાં વધારો અને પેટની ચરબી
મેનોપોઝ પછી સ્ત્રીઓના મેટાબોલિઝમમાં ધીમી ગતિ થાય છે, જેના કારણે વજનમાં વધારો થાય છે. ખાસ કરીને પેટ પર ચરબી વધુ જમા થવાની શક્યતા રહે છે.

૪. માનસિક તણાવ અને ડિપ્રેશન
હોર્મોનલ બદલાવના કારણે સ્ત્રીઓને ઘણીવાર માનસિક તણાવ, ચિંતાઓ અને હળવી ડિપ્રેશન અનુભવાય છે.

મેનોપોઝનો સામનો કેવી રીતે કરવો?

૧. સ્વસ્થ આહાર અપનાવો
  • પ્રોટીન અને કેલ્શિયમ યુક્ત ભોજન: દૂધ, દહીં, પનીર, બદામ અને લીલાં શાકભાજી ખાવા જોઈએ.
  • ફળ અને શાકભાજી: એન્ટી-ઓક્સીડન્ટ અને ફાઇબરવાળા ફળ અને શાકભાજી જેમ કે કેરી, પપૈયું, દાડમ, ગાજર, અને બીટ ફાયદાકારક છે.
  • કઠોળ: બ્રાઉન રાઈસ, ઓટ્સ અને મકાઈ શરીરને ઊર્જા આપે છે.
  • પ્રોસેસ્ડ ખોરાક ટાળો: તળેલા અને વધારાના શુગરવાળા ખોરાકને ઓછા કરો.
૨. નિયમિત કસરત કરો
  • યોગ અને પ્રાણાયામ
  • વોકિંગ અને જોગિંગ
  • હળવા વજન ઉપાડવાની કસરત (સ્ટ્રેન્થ ટ્રેનિંગ)
૩. સ્ટ્રેસ મેનેજમેન્ટ
  • ધ્યાન (મેડિટેશન) અને બ્રિથેંગ એક્સરસાઈઝ કરો.
  • પરિવાર અને મિત્રો સાથે સમય વિતાવો.
  • હસતા રહેવું
૪. ડોક્ટરની સલાહ લો
  • હોર્મોન રિપ્લેસમેન્ટ થેરાપી (HRT) વિશે જાણો.
  • રેગ્યુલર હેલ્થ ચેકઅપ કરો.

મેનોપોઝને લઈને ઘણી સ્ત્રીઓમાં ગભરાટ અને ડર જોવા મળે છે. “હવે મારી ઉંમર થઈ ગઈ છે …” “હું પહેલા જેવી નથી રહી…” – આવી વિચારો સ્ત્રીઓના મનમાં ન આવે તો જ નવાઈ!

અહીં મમતા અંટાળિયાનો ઉદાહરણ જોઈએ. અમદાવાદની મમતાને ૪૮ વર્ષની ઉંમરે હોટ ફ્લૅશ અને ઊંઘમાં તકલીફ શરૂ થઈ. દવા લીધા વગર, તેમણે યોગ અને આયુર્વેદ અપનાવ્યું. આજે તે ૫૨ વર્ષના છે અને તે એકદમ ફીટ છે. વજન પણ નિયંત્રણમાં છે અને એકદમ સકારાત્મક જીવન જીવી રહ્યા છે.

મેનોપોઝ એટલે સ્ત્રી તેના જીવનના ત્રીજા તબક્કામાં પ્રવેશે છે. બાળપણ અને યુવાનાવસ્થાની જેમ આ તબકકાને પણ ખુશી ખુશી સ્વીકારવું રહ્યું. એ બોઝ નથી પણ એક સત્ય છે, જે દરેકના જીવનમાં આવે છે અને આ સચ્ચાઈ દરેકે સ્વીકારવી રહી. તો પછી નાનમ શેની. આ કોઈ રોગ નથી. તેને સ્વીકારો સહજતાથી તો એ સરળ બની રહેશે. જેમ જેમ જીવન બદલાય છે, તેમ આપણે પણ બદલાવ લાવવો જોઈએ. મેનોપોઝ એ કોઈ અંત નથી, પરંતુ નવા અધ્યાયની શરૂઆત છે. મેનોપોઝ એ સ્ત્રી જીવનની એક મહત્વપૂર્ણ અવસ્થા છે. જો કે, સાચી માહિતી, સકારાત્મક દ્રષ્ટિકોણ અને સ્વસ્થ જીવનશૈલી દ્વારા તેને સરળ અને આરામદાયક બનાવવી શક્ય છે. મેનોપોઝ પછીનું જીવન પણ ઊર્જાવાન, ખુશહાલ અને સંપૂર્ણ હોઈ શકે- શરત એટલી કે સ્ત્રીઓએ પોતાને પ્રાથમિકતા આપવી શીખવી જોઈએ!

Liked this? Get one story a day on WhatsApp.
Join

Read next

શિયાળામાં ડિનર ટાઈમિંગ: તમારા મેટાબોલિઝમ અને ઊંઘ માટે શું છે સૌથી યોગ્ય? ફેટી લીવરથી બચવા કેન્દ્રે ૧૦% તેલ ઘટાડવાની અપીલ કરી શહેરની પ્રદૂષિત હવાથી ફેફસાંને નુકસાનથી બચવાના આ રહ્યા સાદા ઘરેલું ઉપાયો!