માનવ સેવાને જ માધવ સેવા માનતા શ્રીરામકૃષ્ણ આશ્રમ, રાજકોટ દ્વારા વર્તમાન શિયાળાની ઋતુ દરમિયાન ચાર જિલ્લાઓના અંતરિયાળ વિસ્તારોમાં વ્યાપક શીતકાળ રાહત કાર્ય હાથ ધરવામાં આવ્યું છે. આ સેવા અભિયાન અંતર્ગત રાજકોટ, જૂનાગઢ, અમરેલી અને દેવભૂમિ દ્વારકા જિલ્લાના અતિ અંતરિયાળ ગામડાઓ તથા વાડી વિસ્તારોમાં વસતા ખેતમજૂરો અને શ્રમિક પરિવારોને 750 જેટલા ધાબળાનું વિતરણ કરવામાં આવ્યું.
કડકડતી ઠંડીના સમયમાં આર્થિક રીતે પછાત પરિવારોને રક્ષણ મળી રહે તે હેતુથી આશ્રમ દ્વારા આયોજનબદ્ધ રીતે આ સેવાકીય પ્રકલ્પ અમલમાં મૂકાયો હતો. ખાસ કરીને રોજિંદી મજૂરી પર આધારિત પરિવારો, ખેતી કામદારો અને સ્થળાંતરિત શ્રમિકો સુધી સહાય પહોંચે તે માટે સેવાકાર્યો દૂરદરાજ વિસ્તારો સુધી વિસ્તરાવવામાં આવ્યા હતા.
આ અભિયાન દરમિયાન ફક્ત ભૌતિક સહાય પૂરતી સીમિત ન રહી, પરંતુ સમાજ ઘડતરનો દૃષ્ટિકોણ પણ અપનાવવામાં આવ્યો. બાળકોમાં નૈતિક મૂલ્યો, સ્વદેશી ભાવના અને રાષ્ટ્રપ્રેમનું બીજ રોપાય તે હેતુથી સ્વામી વિવેકાનંદના પ્રેરણાદાયી ‘સ્વદેશ મંત્ર’ અંકિત કાર્ડ્સનું વિતરણ કરવામાં આવ્યું. સાથે જ બાળકો માટે પૌષ્ટિક નાસ્તાના પેકેટ પણ આપવામાં આવ્યા, જેથી સ્વાસ્થ્ય અને સંસ્કાર બંનેને પ્રોત્સાહન મળે.
શ્રીરામકૃષ્ણ આશ્રમ, રાજકોટ વર્ષોથી શિક્ષણ, આરોગ્ય અને સામાજિક સેવાના ક્ષેત્રે સક્રિય છે. શિયાળાની ઋતુમાં આયોજિત આ રાહત કાર્ય દ્વારા આશ્રમે છેવાડાના માનવી સુધી હૂંફ પહોંચાડવાનો પ્રયત્ન કર્યો છે. સ્થાનિક સ્વયંસેવકોની મદદથી સેવા કાર્યને અસરકારક રીતે પૂર્ણ કરવામાં આવ્યું.
આશ્રમ દ્વારા જણાવવામાં આવ્યું કે આવનારા સમયમાં પણ આવા સેવાકીય પ્રકલ્પો દ્વારા સમાજના નબળા વર્ગોને સહારો આપવા પ્રતિબદ્ધતા યથાવત રહેશે. શીતકાળ રાહત અભિયાન માત્ર સહાય નથી, પરંતુ માનવ સંવેદના અને સામાજિક જવાબદારીનું જીવંત ઉદાહરણ છે.
Subscribe Deshwale on YouTube
