ભારતીય શેરબજારો ઑક્ટોબર 2024થી એટલે કે છ મહિનાથી સતત ઘટી રહ્યા છે. ઓક્ટોબર 2024 અને ફેબ્રુઆરી 2025 આ બે મહિનામાં મોટા ઘટાડા નોંધાયા હતા. એનએસઇ નિફ્ટી-50 ઇન્ડેક્સની વાત કરીએ તો 26,200ની ટોચથી અત્યાર સુધીમાં 22,000ની સપાટી બનાવીને 16 ટકા તૂટ્યો છે. ભારતીય શેરબજારમાં ચાલી રહેલી વેચવાલીથી રોકાણકારોને છેલ્લા પાંચ મહિનામાં 94 લાખ કરોડ રૂપિયાનું નુકસાન થયું છે. સેન્સેક્સ અને નિફ્ટી બંને સપ્ટેમ્બર 2024ના તેમના સર્વકાલીન ઉચ્ચતમ સ્તરથી 16% ઘટ્યા છે. 2025માં જ, બીએસઈ સેન્સેક્સ અને એનએસઈ નિફ્ટીમાં 7%નો ઘટાડો થયો છે. આ કારણે રોકાણકારોને આ વર્ષે લગભગ 62 લાખ કરોડ રૂપિયાનું નુકસાન થયું. 28 ફેબ્રુઆરીના રોજ બજાર બંધ થયા પછી બીએસઈ પર લિસ્ટેડ કંપનીઓનું બજાર મૂડીકરણ ઘટીને રૂ. 384 લાખ કરોડ થયું. સપ્ટેમ્બર 2024માં, બીએસઈ પર લિસ્ટેડ કંપનીઓનું બજાર મૂડીકરણ તેના સર્વકાલીન ઉચ્ચતમ સ્તરે રૂ. 478 લાખ કરોડ હતું.
કોવિડ-19 મહામારી પછી ફેબ્રુઆરી 2025 ભારતીય શેરબજાર માટે સૌથી ખરાબ મહિનો હતો. આ સમયગાળા દરમિયાન, ઇક્વિટી બેન્ચમાર્ક સૂચકાંકો લગભગ 6% ઘટ્યા અને રોકાણકારોને રૂ. 40 લાખ કરોડનું નુકસાન થયું. તાજેતરના સમયમાં, વિદેશી સંસ્થાકીય રોકાણકારો (FII) દ્વારા સતત વેચાણ અને યુએસ ટેરિફ ચિંતાઓ વચ્ચે વધતી આર્થિક અનિશ્ચિતતાને કારણે ભારતીય બજારો પર પ્રતિકૂળ અસર પડી છે. આ 29 વર્ષમાં પહેલી વાર બન્યું. 1996 પછી આ પહેલી વાર છે જ્યારે નિફ્ટી 50 એ સતત પાંચ મહિના સુધી નુકસાન નોંધાવ્યું છે. આ એક દુર્લભ ઘટના છે. જુલાઈ 1990માં નેશનલ સ્ટોક એક્સચેન્જ (NSE) બેન્ચમાર્ક શરૂ થયા પછી આવું ફક્ત બે વાર બન્યું છે.
નિફ્ટીએ 1995માં તેનું સૌથી ખરાબ માસિક પ્રદર્શન નોંધાવ્યું. તે સમયે બેન્ચમાર્ક ઇન્ડેક્સે સપ્ટેમ્બર 1995 થી એપ્રિલ 1996 સુધીના આઠ મહિનાનો સૌથી મોટો ઘટાડો નોંધાવ્યો હતો. આ સમયગાળા દરમિયાન નિફ્ટીમાં 31%નો ઘટાડો થયો હતો.
અમેરિકાના રાષ્ટ્રપતિ ડોનાલ્ડ ટ્રમ્પ દ્વારા ભારત સહિત અન્ય વેપાર ભાગીદારો પર પારસ્પરિક કર લાદવાની જાહેરાતથી અમેરિકાના બોન્ડ યીલ્ડમાં વધારો થયો છે. આ કારણોસર, વૈશ્વિક રોકાણકારો ઉભરતા બજારોમાંથી તેમના નાણાં પાછા ખેંચી રહ્યા છે અને તેને ડોલર-લિંક્ડ મૂલ્યવાન સંપત્તિઓમાં રોકાણ કરી રહ્યા છે. જેના કારણે ભારત સહિત અન્ય ઉભરતા બજારોમાં વેચવાલીનો સામનો કરવો પડ્યો છે. ગયા અઠવાડિયે, રૂપિયો ડોલર સામે 87.95 ના સૌથી નીચા સ્તરે પહોંચ્યો હતો.
28 ફેબ્રુઆરીના રોજ, FII એ ₹11,639 કરોડના ભારતીય શેર વેચ્યા, જે મહિના દરમિયાનનો તેમનો સૌથી મોટો એક દિવસનો વેચાણનો રેકોર્ડ છે. ફેબ્રુઆરી મહિનામાં વિદેશી રોકાણકારોએ કુલ ₹34,574 કરોડ ઉપાડ્યા હોવાનું નોંધાયું છે. ગયા વર્ષે સપ્ટેમ્બરથી અત્યાર સુધીમાં વિદેશી રોકાણકારોએ ₹1 લાખ કરોડથી વધુ રકમ પાછી ખેંચી લીધી છે.
