ઇન્ડિયન ઇન્સ્ટિટ્યૂટ ઓફ માસ કોમ્યુનિકેશન (IIMC) 4 માર્ચ, 2025ના રોજ તેના 56મા દીક્ષાંત સમારોહની ભવ્ય ઉજવણી કરશે. આ પ્રસંગે કેન્દ્રીય મંત્રી શ્રી અશ્વિની વૈષ્ણવ મુખ્ય અતિથિ તરીકે ઉપસ્થિત રહેશે. IIMCના નવી દિલ્હી સ્થિત મહાત્મા ગાંધી મંચ પર આયોજિત આ કાર્યક્રમમાં 478 વિદ્યાર્થીઓને ડિપ્લોમા અને શ્રેષ્ઠતા પુરસ્કારોથી સન્માનિત કરવામાં આવશે.
આ વર્ષના દીક્ષાંત સમારોહમાં IIMCના નવી દિલ્હી અને પાંચ પ્રાદેશિક કેમ્પસ (ઢેંકનાલ, આઇઝોલ, અમરાવતી, કોટ્ટાયમ અને જમ્મુ)ના 2023-24 બેચના વિદ્યાર્થીઓ ભાગ લેશે. 9 અલગ અભ્યાસક્રમોમાંથી પાસ થયેલા આ વિદ્યાર્થીઓને અનુસ્નાતક ડિપ્લોમા પ્રમાણપત્રો એનાયત કરવામાં આવશે. સાથે જ, 36 ઉત્કૃષ્ટ વિદ્યાર્થીઓને તેમની શૈક્ષણિક શ્રેષ્ઠતા માટે મેડલ અને રોકડ પુરસ્કારોથી સન્માનિત કરવામાં આવશે.
આ પ્રસંગે શ્રી અશ્વિની વૈષ્ણવ મુખ્ય ભાષણ આપશે. IIMCના અધિકારીઓએ જણાવ્યું હતું કે, “આ સમારોહ મીડિયા અને સંદેશાવ્યવહારના ક્ષેત્રમાં શ્રેષ્ઠતાની ઉજવણી છે. IIMC દ્વારા તૈયાર થયેલા વિદ્યાર્થીઓ દેશના મીડિયા ક્ષેત્રમાં નવી દિશા આપશે.”
IIMC ભારતની અગ્રણી મીડિયા શિક્ષણ સંસ્થા છે, જે 1965માં સ્થાપના થયેલી છે. આ સંસ્થા હિન્દી, અંગ્રેજી, ઓડિયા, મરાઠી, મલયાલમ અને ઉર્દૂ પત્રકારત્વ સહિત વિવિધ ક્ષેત્રોમાં પીજી ડિપ્લોમા અભ્યાસક્રમો ઓફર કરે છે. 2024માં યુનિવર્સિટીનો દરજ્જો મળ્યા બાદ, IIMCએ મીડિયા બિઝનેસ સ્ટડીઝ અને સ્ટ્રેટેજિક કોમ્યુનિકેશનમાં પોસ્ટ ગ્રેજ્યુએટ ડિગ્રી પ્રોગ્રામ પણ શરૂ કર્યા છે.
આ દીક્ષાંત સમારોહમાં IIMCના ફેકલ્ટી સભ્યો, વિદ્યાર્થીઓ અને તેમના પરિવારજનો ઉપસ્થિત રહેશે. આ કાર્યક્રમ મીડિયા શિક્ષણમાં IIMCની પ્રતિબદ્ધતા અને શ્રેષ્ઠતાને ફરી એકવાર રેખાંકિત કરશે.
