બે અલગ અલગ રાજ્યો કે કેન્દ્રશાસિત પ્રદેશોના સમાન આલ્ફાન્યુમરિક શ્રેણીના ઉપયોગને કારણે ડુપ્લિકેટ એપિક નંબરોના કેટલાક કિસ્સા સામે આવ્યા છે
ભારતીય ચૂંટણી પંચે બે અલગ અલગ રાજ્યોના મતદારોના ઇલેક્શન કાર્ડ કે એપિક નંબરો સમાન હોવાના મુદ્દે સ્પષ્ટતા કરી છે. સોશિયલ મીડિયા પોસ્ટ્સ અને મીડિયા રિપોર્ટ્સમાં પ્રસિદ્ધ આવા કિસ્સાઓના સંદર્ભમાં એ સ્પષ્ટતા પંચે કરી છે.
ચૂંટણી પંચે જણાવ્યું છે કે જ્યારે કેટલાક મતદારોના એપિક નંબરો સરખા હોઈ શકે છે, ત્યારે પણ, એવા મતદારોની વસ્તી વિષયક વિગતો, વિધાનસભા મતવિસ્તાર અને મતદાન મથક સહિતની વિગતો અલગ હોય છે. એપિક નંબરને ધ્યાનમાં લીધા વિના કોઈ પણ મતદાર તેમના રાજ્ય કે કેન્દ્રશાસિત પ્રદેશમાં સંબંધિત મતવિસ્તારમાં, નિયુક્ત મતદાન મથકે જ મતદાન કરી શકે છે. જે તે મતદાર ચોક્ક્સ યાદીમાં જ નોંધાયેલા હોય છે અને બીજે ક્યાંય નહીં.
કેટલાક મતદારોને સમાન એપિક નંબર કે શ્રેણીની ફાળવણી થવાનું કારણ પણ પંચે જણાવ્યું હતું. એ કારણ, રાજ્યો અને કેન્દ્રશાસિત પ્રદેશોના મતદાર યાદીનો ડેટાબેઝ, એરોનેટ પ્લેટફોર્મ પર સ્થાનાંતરિત કરતા પહેલાં અનુસરવામાં આવતી વિકેન્દ્રિત અને મેન્યુઅલ પદ્ધતિ હતી. એના પરિણામે ચોક્કસ રાજ્ય કે કેન્દ્રશાસિત પ્રદેશનાં સીઈઓ કાર્યાલયોએ સમાન એપિક આલ્ફાન્યુમરિક શ્રેણીનો ઉપયોગ કર્યો. એના લીધે વિવિધ વિધાનસભા મતવિસ્તારોમાં મતદારોને ડુપ્લિકેટ એપિક નંબરો ફાળવવાની શક્યતાને અવકાશ મળ્યો.
જોકે કોઈપણ શંકા દૂર કરવા માટે પંચે નોંધાયેલા મતદારોને અનન્ય એપિક નંબર ફાળવવાનું સુનિશ્ચિત કરવાનો નિર્ણય લીધો છે. હવે, ડુપ્લિકેટ એપિક નંબરના કિસ્સામાં એકઅનન્ય એપિક નંબર ફાળવીને સુધારો કરવામાં આવશે. પ્રક્રિયામાં મદદ અને સહાય કરવા માટે એરોનેટ 2.0 પ્લેટફોર્મ અપડેટ કરવામાં આવશે.
